ទស្សនាវដ្ដីវិទ្យាសាស្រ្តកុំព្យូទ័រ

The New iPad ចាប់ផ្តើមចេញលក់ជាផ្លូវការនៅក្នុងព្រះរាជាណាចក្រកម្ពុជា

samnang — Fri, 18 May 2012 09:43:20 +0000

ថ្ងៃទី11ខែឧសភា ឆ្នាំ2012 ក្រុមហ៊ុន iOne ដែលជាក្រុមហ៊ុនធំមានសិទ្ធិនាំចូលនូវផលិតផល Apple មកកាន់ទីផ្សារព្រះរាជាណាចក្រកម្ពុជា បានបើកសម្ពោធចេញលក់ជាផ្លូវការនូវផលិតផលថ្មីរបស់ក្រុមហ៊ុន Apple គឺ The New iPad។ កម្មវិធីនេះប្រារព្ធធ្វើឡើងនៅ iOneCanadia ដែលមានទីតាំងស្ថិតនៅជាន់ផ្ទាល់ដី នៃវិមានកាណាដាឌីយ៉ា ដោយមានការអញ្ជើញចូលរួមជាកិត្តិយសយ៉ាងខ្ពង់ខ្ពស់បំផុតពីសំណាក់លោកជំទាវ ហ៊ុន ម៉ាណា អគ្គនាយិការស្ថានីយទូរទស្សន៍បាយ័ន និងលោកស្រី សុខ សុភ័ក្ត្រ នាយិកាគ្រប់គ្រងក្រុមហ៊ុន iOne ព្រមទាំងភ្ញៀវកិត្តិយសមកពីបណ្ដាស្ថាប័ន និងក្រុមហ៊ុននានាយ៉ាងច្រើនកុះករ។

ក្រុមហ៊ុន iOne បានបញ្ជាក់ឱ្យដឹងថាក្រុមហ៊ុនមានមោទនភាពយ៉ាងខ្លាំងនៅក្នុងការនាំមកនូវផលិតផលថ្មី The New iPad នេះមកកាន់ទីផ្សារព្រះរាជាណាចក្រកម្ពុជា ពីព្រោះថា នេះជាការរួមចំណែកដ៏សំខាន់មួយក្នុងការលើក ស្ទួយនិង អភិវឌ្ឍន៍វិស័យបច្ចេកវិទ្យាឱ្យកាន់តែមានភាពរីកចម្រើនខ្លាំងថែមទៀត។ The New iPad គឺជាផលិតផលថ្មីមួយត្រូវបានអ្នកប្រើប្រាស់ជាច្រើននៅទូទាំងពិភពលោកកំពុងតែទន្ទឹងរង់ចាំហើយបានចាត់ទុកថាជាផលិតផលដែលមានលក្ខណៈទំនើបជាងគេ ដោយវាត្រូវបានក្រុមហ៊ុនបំពាក់នូវប្រព័ន្ធប្រតិបត្តិការ iOS5 និង បានរួមបញ្ចូលនូវមុខងារថ្មី iCloudFacetime និង iMassage ជាពិសេសការរចនាឡើងជាមួយនឹងអេក្រង់ប្រភេទ Ratina Display បំពាក់នូវបន្ទះឈីប A5X អង្គក្រាហ្វិកមានកំលាំងខ្លាំងជាងមុនរហូតដល់ទៅពីរដង និងមានកាមេរ៉ាសំរាប់ថតរូបទំហំ ៥មេហ្គាភិចសែល ដែលមានសមត្ថភាពអាចថតវីដេអូបាននៅក្នុងកម្រិតFull HD 1080p។

នៅក្នុងកម្មវិធីបើកសម្ពោធចេញលក់ The New iPad ថ្មីនេះក្រុមហ៊ុន iOne បានផ្តល់នូវកម្មវិធីពិសេសបំផុតសម្រាប់ ភ្ញៀវកិត្តិយសទាំងអស់ដែលបានអញ្ជើញចូលរួម ដោយក្នុងនោះសម្រាប់អតិថិជនចំនួន50នាក់ដំបូងដែលបានជាវផលិតផល The New iPad នឹងទទួលបានការបន្ថែមជូននូវកាដូពិសេសបំផុតដែលមានតម្លៃស្មើនឹង ១២៨ ដុល្លាហើយការផ្តល់ជូននេះគឺធ្វើឡើងនៅតែសាខា iOneCanadia នេះតែមួយប៉ុណ្ណោះ។

សូមបញ្ជាក់ផងដែរថាក្រុមហ៊ុន iOne គឺជាក្រុមហ៊ុនដ៏ធំតែមួយគត់ដែលបាននាំមកនូវផលិតផល Apple ថ្មីៗ និងមាន លក្ខណៈទំនើបបំផុតមកកាន់ទីផ្សារនៅក្នុងព្រះរាជាណាចក្រកម្ពុជាហើយរាល់ផលិតផលទាំងអស់ ដែលបាននាំមកគឺសុទ្ធសឹងតែមានការធានាត្រឹមត្រូវជូនដល់អតិថិជនហើយការចេញលក់ជាផ្លូវការនូវផលិត The New iPad ថ្មីនេះគឺមានលក់នូវទូទាំង ៦ សាខានៃសាខាទាំង ៧របស់ក្រុមហ៊ុន iOne ដែលនៅក្នុងទីក្រុងភ្នំពេញមាន ៥សាខា: ទីតាំងទីមួយ iOneCanadia មានអាសយដ្ឋានស្ថិតនៅជាន់ផ្ទាល់ដី អាគារពាណិជ្ជកម្មកាណាឌីយ៉ាមហាវិថីព្រះមុនីវង្សកែងផ្លូវក្រមួនសរ ទូរស័ព្ទលេខ 023 99 88 89, ទីតាំងទីពីរ iOneSovanaមានទីតាំងនៅក្នុងផ្សារទំនើបសុវណ្ណាជាន់ផ្ទាល់ដី ទូរស័ព្ទលេខ 023 99 31 81, ទីតាំងទីបី iOneRatana មានទីតាំងស្ថិតនៅក្នុងផ្សារទំនើបរតនាផ្លាហ្សា ជាន់ផ្ទាល់ដី ទូរស័ព្ទលេខ 023 88 31 01, ទីតាំងទីបួន iOneMonivong មាន អាសយដ្ឋានស្ថិតនៅ អគារលេខ 463 មហាវិថីព្រះមុនីវង្សខាងត្បូងអតីតក្រសួងទេសចរណ៍ ទូរស័ព្ទលេខ 023 222 240, ទីតាំងទីប្រាំ iOnePreah Sihanouk មានទីតាំងស្ថិតនៅផ្ទះលេខ 158 អាគារ (Lucky Burger) ជាន់ទីពីរតាមបណ្តោយមហាវិថីព្រះសីហនុ ទូរស័ព្ទលេខ 023 99 3163, និងទីតាំងទីប្រាំមួយ ស្ថិតនៅខេត្តសៀមរាប គឺ iOneSiem Reapមានអាសយដ្ឋានស្ថិតនៅអគារ លេខ AII 1776 ផ្លូវស៊ីវត្ថាមណ្ឌល 2សង្កាត់ស្វាយដង្គុំខេត្តសៀមរាប ទូរស័ព្ទលេខ 063 761 019៕

Samsung Galaxy S III ទទួលបានការកុម្ម៉ង់ទិញ ៩លានគ្រឿង

samnang — Fri, 18 May 2012 08:12:13 +0000

យោងតាមរបាយការណ៍មួយដែលចេញដោយកាសែត Korea Economic Daily បានឱ្យដឹងថានៅពេលនេះ Samsung Galaxy S III ទទួលបានការកុម្ម៉ង់មុនដល់ទៅ ៩លានគ្រឿងហើយនៅជុំវិញពិភពលោក។

យើងបានធ្វើការប៉ានស្មានទុកថា Samsung Galaxy S III នឹងក្លាយជាទូរស័ព្ទដែលលក់ដាច់ជាងគេទៅហើយ ប៉ុន្តែអ្វីដែលភ្ញាក់ផ្អើលបំផុតនោះគឺមិននឹកស្មានថាអាចកើនដល់ចំនួនយ៉ាងច្រើនដូច្នេះឡើយ។ ចំនួននៃការកុម្ម៉ង់ដ៏ច្រើននេះ គឺស្ទើរតែស្មើនឹងពាក់កណ្ដាលនៃការលក់ Samsung Galaxy S II ទៅហើយ។ Samsung Galaxy S II ត្រូវចំណាយពេលដល់ទៅ ១០ខែដើម្បីលក់បានចំនួន ២០លានគ្រឿង តែសម្រាប់Samsung Galaxy S III វិញគឺត្រឹមតែ ២សប្ដាហ៍ប៉ុណ្ណោះបន្ទាប់ពីថ្ងៃដាក់បង្ហាញ ហើយនេះវាមិនទាន់បានចូលដល់ទីផ្សារនៅឡើយផង។

មើលទៅលើកនេះក្រុមហ៊ុន Samsung មានវត្ថុទិព្វក្នុងដៃដើម្បីប្រកួតប្រជែងជាមួយនឹងក្រុមហ៊ុនទូរស័ព្ទដទៃរួចជាស្រេចហើយ។ នៅពេលនេះក្រុមហ៊ុន Samsung ប្រហែលជាមានអារម្មណ៍កក់ក្ដៅបន្តិចហើយ ដោយសារតែពួកគេទទួលបានការកុម្ម៉ង់ទិញពីអតិថិជនដ៏ច្រើនបែបនេះ។

អ្នកប្រើប្រាស់ភាគច្រើនបានងាកមកជ្រើសរើសប្រើ Samsung Galaxy S III ដោយសារតែ Smartphone មួយនេះត្រូវបានផលិតឡើងដោយបច្ចេកវិទ្យាចុងក្រោយបំផុត ដែលមានដូចជា CPU ប្រភេទ quad-core Exynos ទំហំ 1.4GHz ហើយប្រព័ន្ធដំណើរការចុងក្រោយបំផុតរបស់ Android និងពិសេសបំផុតនោះគឺប្រព័ន្ធ 4G LTE Network ដែលអាចប្រើប្រាស់អ៊ីនធឺណិតបានយ៉ាងលឿន។ ប៉ុន្តែ Smartphone ដ៏ល្បីមួយនេះគឺមិនទាន់នាំចូលទីផ្សារសហរដ្ឋអាមេរិកនៅឡើយទេ៕

ហ្វេសប៊ុក ក៏បង្កើត Cloud Storage មួយដែរ

samnang — Fri, 18 May 2012 04:11:06 +0000

នៅថ្ងៃសុក្រនេះបណ្ដាញទំនាក់ទំនងសង្គម ហ្វេសប៊ុក បានបញ្ជាក់ប្រាប់ថា ក្រុមហ៊ុននឹងបញ្ចេញនូវសេវាកម្មរក្សាទិន្នន័យលើអ៊ីនធឺណិត( Cloud Storage ) សម្រាប់ឱ្យអតិថិជនរបស់ខ្លួនប្រើប្រាស់។ សេវាកម្មថ្មីរបស់ ហ្វេសប៊ុកនេះនឹងចូលរួមប្រជែងជាមួយនឹងសេវាកម្មផ្ទុកទិន្នន័យរបស់ Dropbox, Google និងសេវាកម្មជាច្រើនទៀត ដែលផ្ដល់លទ្ធភាពផ្ទុកឯកសារដោយឥតគិតថ្លៃ ឬបង់ថ្លៃ ហើយអាចប្រើប្រាស់បានលើឧបករណ៍ជាច្រើនដូចជា កុំព្យូទ័រ ទូរស័ព្ទ ឬTablet ជាដើម។

ការបន្ថែមនូវសេវាកម្មថ្មីរបស់ ហ្វេសប៊ុក នេះនឹងប្រកាសជាផ្លូវការក្នុងទ្រង់ទ្រាយធំនៅសប្ដាហ៍ក្រោយ ដែលអាចទាញយកសមាជិកជាង ៩០០លាននាក់នៅជុំវិញពិភពលោក។

ស្ត្រីអ្នកនាំពាក្យម្នាក់ឈ្មោះ Meredith Chin បាននិយាយថា កាលពីម្សិលមិញ យើងទើបតែបន្ថែមលក្ខណថ្មីមួយទៅក្នុង ហ្វេសប៊ុក ដោយអនុញ្ញាតឱ្យអ្នកប្រើប្រាស់ ដែលជាសមាជិកក្នុងក្រុមអាច Upload និងចែករំលែក File បានដោយសេរី។

ហ្វេសប៊ុកនឹងធ្វើការកំណត់សិទ្ធិក្នុងការផ្ទុកទិន្នន័យត្រឹម 25GB ហើយនឹងមិនអនុញ្ញាតឱ្យផ្ទុកនូវឯកសារមួយចំនួនដូចជា បទចម្រៀងជាដើមដោយសារតែវាគឺជាកម្មសិទ្ធិបញ្ញារបស់អ្នកចម្រៀង ហើយប្រភេទទិន្នន័យដែលមិនត្រឹមត្រូវ ពោលគឺអាចបង្កនូវបញ្ហាផ្សេងៗក៏ត្រូវបានលើកលែងផងដែរ។

ចំណែកឯការផ្ទុះឡើងនៃការពេញនិយមប្រើប្រាស់ Smartphone និង Tablet ដ៏ខ្លាំងក្លា នឹងក្លាយជាមូលដ្ឋាននៃការប្រើប្រាស់ជាប្រចាំនូវសេវាកម្មផ្ទុកទិន្នន័យលើអ៊ីនធឺណិតនេះ ដោយពួកគេគឺត្រូវការទំហំផ្ទុកបន្ថែម ឬសេវាកម្មបន្ថែមនៅក្នុង Cloud ដូចដែលការផ្ដល់សេវាកម្មរបស់ Apple និង Dropbox ជាដើម៕

ក្រុមហ៊ុន HP គ្រោងកាត់បន្ថយបុគ្គលិកដល់ទៅ ២៥០០០នាក់

samnang — Fri, 18 May 2012 02:55:16 +0000

តាមប្រភពព័ត៌មានមួយដែលចេញផ្សាយដោយក្រុមហ៊ុន Hewlett-Packard (HP) កំពុងតែពិចារណាលើការកាត់បន្ថយបុគ្គលិកក្នុងទ្រង់ទ្រាយធំមួយ ដែលអាចមានចំនួនដល់ទៅ ២៥០០០នាក់ ចេញពីក្រុមហ៊ុន។

តាមប្រភពរបាយការណ៍មួយរបស់គេហទំព័រ Bloomberge ក៏បានបញ្ជាក់ផងដែរថា ការកាត់បន្ថយបុគ្គលិកដ៏ច្រើននេះ គឺស្មើនឹងចំនួនបុគ្គលិកទូទាំងពិភពលោក ៨ភាគរយ ហើយក្នុងរវាងបុគ្គលិកពី ១០០០០ ទៅ១៥០០០នាក់គឺអាចកាត់ចេញមកពីក្រុមសេវាកម្មនៃសហគ្រាសខ្នាតតូច ដែលជាសេវាកម្មផ្ដល់ព័ត៌មានផ្នែកលក់របស់ក្រុមហ៊ុន។ ម្យ៉ាងទៀតតាមប្រភពមិនស្គាល់ឈ្មោះនៃអ្នកសារព័ត៌មានរបស់ Bloomberg បាននិយាយថាគម្រោងកាត់បន្ថយបុគ្គលិកនេះគឺមិនទាន់បញ្ចប់នៅឡើយទេ ហើយប្រហែលជានឹងមានការផ្លាស់ប្ដូរផ្សេងទៀតផងដែរ។ ចំណែកឯបុគ្គលិកជាច្រើនពាន់នាក់ទៀត ដែលត្រូវបានក្រុមហ៊ុនបញ្ឈប់នោះនឹងអាចទទួលបាននូវកញ្ចប់ប្រាក់អតីតភាពទៅតាមពេលវេលានៃការងាររបស់ខ្លួន។

ក្រុមហ៊ុន HP បានបញ្ជាក់ប្រាប់ថា ការកាត់បន្ថយនេះគឺធ្វើឡើងបន្ទាប់ការរៀបចំរចនាសម្ព័ន្ធក្រុមហ៊ុនសារជាថ្មីកាលពីខែមីនាកន្លងទៅ ដោយបានបញ្ចូល Personal System Group ជាមួយនឹង Imaging and Printing Group។ ប៉ុន្តែក្រុមហ៊ុននៅមិនទាន់បង្ហើបពីមូលហេតុផ្សេងទៀត ទាក់ទងនឹងការកាត់បន្ថយបុគ្គលិកដ៏ច្រើននេះនៅឡើយទេ។

គួរបញ្ជាក់ផងដែរថាគម្រោងកាត់បន្ថយបុគ្គលិករបស់ក្រុមហ៊ុន HP នេះនឹងក្លាយជាការកាត់បន្ថយបុគ្គលិកធំជាងគេនៅសហរដ្ឋអាមេរិក៕

it4ug.net បច្ចេកព័ត៌មានវិទ្យាជាភាសាខ្មែរ

samnang — Thu, 17 May 2012 09:53:46 +0000

it4ug.net គឺជាគេហទំព័រភាសាជាតិ ដែលប្រមូលផ្ដុំទៅដោយអត្ថបទសំខាន់ៗ និងមានប្រយោជន៍ជាច្រើន ចំពោះការរចនាទម្រង់បង្ហាញគឺមានភាពស្រស់ស្អាត និងងាយស្រួលក្នុងការទស្សនា។នៅពេលបានបើកចូលទៅក្នុងវិបសាយមួយនេះ លោកអ្នកនឹងមានអារម្មណ៍ថា អត្ថបទនីមួយបានរៀបចំទៅតាមផ្នែកយ៉ាងល្អ ហើយអាចរកមើលអត្ថបទថ្មីៗ ដែលបានបង្ហោះបានយ៉ាងងាយស្រួល។
សម្រាប់គោលបំណងក្នុងការបង្កើតប្លក់នេះឡើង គឺដើម្បីចែករំលែកនូវចំណេះដឹង បទពិសោធន៍រវាងគ្នាទៅវិញទៅមក។ ជាពិសេសចង់រក្សានូវទំនៀមទម្លាប់ប្រពៃណីរបស់ខ្មែរអោយបានស្ថិតស្ថេរ។

ដំឡើង Driverស្វ័យប្រវត្តិដោយប្រើកម្មវិធី Driver Pack Solution

samnang — Thu, 17 May 2012 08:21:21 +0000

តើកុំព្យូទ័ររបស់អ្នកធ្លាប់ជួបបញ្ហារាល់ការដំឡើង Driver ដែលឬទេ?នៅពេលដែលអ្នកដំឡើង Windows រួចកុំព្យូទ័ររបស់អ្នកពិតជាទាមទារ Driver ជាពុំខាន។ ដូចនេះ CM នឹងបង្ហាញអ្នកអំពីកម្មវិធីមួយដែលអាចឱ្យអ្នកដំឡើង Driver ក្នុងកុំព្យូទ័រអ្នកបានយ៉ាងងាយស្រួលដោយប្រើកម្មវិធីឈ្មោះថា Driver Pack Solution។ កម្មវិធី DriverPack Solution ជាកម្មវិធីមួយដែលផ្ដល់លក្ខណៈងាយស្រួលបំផុតដល់អ្នកសម្រាប់ដំឡើង Driver ដោយមិនចាំបាច់ចូលទៅរកDriver តាមអ៊ីនធឺណិតឬទៅ Update driver ក្នុងកុំព្យូទ័រនោះទេគឺមានន័យថាកម្មវិធីនេះនឹងអាចស្វែងរក Driver ដែលគ្មានក្នុងកុំព្យូទ័ររបស់អ្នករួចវាអាចដំឡើងដោយស្វ័យប្រវត្តិ។អ្នកអាចនិយាយបានថាមានកម្មវិធីនេះនៅក្នុងដៃគឺមាន Driver សម្រាប់កុំព្យូទ័ររបស់អ្នកគ្រប់ពេល។

លក្ខណៈពិសេស៖
-ដំណើរការបាននៅលើ៖ Window 2000/ XP/ 2003 / Vista / 7
-ប្រើប្រាស់បានរហូតនិងដោយឥតគិតថ្លៃ។
-មានទំហំ 2.85 GB ។

I.របៀបប្រើប្រាស់
១. ត្រូវមានកម្មវិធី DriverPack Solution បន្ទាប់មកត្រូវចុចលើពាក្យ Autorun ហើយអ្នកនឹងឃើញផ្ទាំងសារមួយចេញនៅលើអេក្រង់កុំព្យូទ័ររបស់អ្នកនៅពេលនោះអ្នកត្រូវចុចលើពាក្យ Expert mode ហើយកម្មវិធីនេះនឹងស្កេនកុំព្យូទ័ររបស់អ្នក បន្ទាប់មកអ្នកត្រូវរង់ចាំឱ្យវាដំណើរការប្រហែលជា៤ទៅ៥នាទីរហូតដល់ចប់។

២. នៅពេលដែលវាដំណើរការរួចអ្នកត្រូវចុចទៅលើពាក្យ Driver ហើយអ្នកនឹងឃើញឈ្មោះ Driver កុំព្យូទ័ររបស់អ្នកដែលត្រូវដំឡើងនោះហើយអ្នកត្រូវចុចទៅលើឈ្មោះទាំងនោះដើម្បីធ្វើការដំឡើងតាមរយៈប្រអប់ Check box។

៣. នៅពេលដែលអ្នកបានចុចទៅលើឈ្មោះទាំងនោះហើយ អ្នកត្រូវចុចលើ ពាក្យ Install នៅខាងស្កាំវា ហើយជាពិសេសនោះអ្នកអាចដំឡើងកម្មវិធីផ្សេងៗទៀតដូចជា កម្មវិធី Google Chrome កម្មវិធី Foxit Reader កម្មវិធីកម្ចាត់មេរោគ Avast ជាដើមបានដោយចុចលើពាក្យ Program ហើយចុចលើកម្មវិធីណាដែលយើងចង់ដំឡើងរួចចុច Install ។

៤. ម្យ៉ាងវិញទៀត អ្នកអាច Backup Drive របស់អ្នកទុកបានដោយចុចលើពាក្យ backup រួចចុច backup driver របស់អ្នកទុកជាការស្រេច។

៥. ជាទីបញ្ចប់អ្នកត្រូវ Restart កុំព្យូទ័ររបស់អ្នកហើយនៅពេលដែលកុំព្យូទ័ររបស់អ្នកដំណើរការឡើងវិញនោះកុំព្យូទ័ររបស់អ្នកនឹងមានក្រាហ្វិកឬ Driver ផ្សេងមានដំណើរការដូចអ្វីដែលអ្នកចង់បានពុំខាន។នេះជាការដំឡើង Driver ក្នុងកុំព្យូទ័ររបស់អ្នកបានយ៉ាងងាយដោយចំណេញទាំងពេលវេលានិងអាចធ្វើវាបានដោយខ្លួនអ្នកផ្ទាល់។ ក្រៅពីមុខងារដែលយើងខ្ញុំបានលើកឡើងខាងលើអ្នកក៏អាចយកកម្មវិធីមួយនេះទៅប្រើប្រាស់ដើម្បីមួយចំនួនទៀតនៅលើប្រតិបត្តិការរបស់ Windows អ្នកកំពុងប្រើប្រាស់ប្រចាំថ្ងៃ៕

deksee.com ស្វែងរកនឹងផ្សាយលក់ទំនិញ

samnang — Thu, 17 May 2012 07:42:59 +0000

ដេកស៊ី គឺជាគេហទំព័រមួយដែលអាចប្រៀបធៀបទៅនឹងផ្សារទំនើបលក់ឥវ៉ាន់នៅលើអ៊ីនធឺណិត ដែលប្រមូលផ្ដុំទៅដោយផលិតផលជាច្រើនប្រភេទ និងជាកន្លែងរកព័ត៌មាន ដ៏គួរឱ្យទុកចិត្តទាក់ទងទៅនឹងផលិតផលផ្សេងៗ ជាមួយតម្លៃនៅក្នុងព្រះរាជាណាចក្រកម្ពុជា។ ទំព័រវិបសាយមួយនេះ ត្រូវបានគេរៀបចំបែងចែកទៅតាមផ្នែកនីមួយៗដើម្បីផ្ដល់ភាពងាយស្រួលក្នុងការស្វែងរកផលិតផលបានកាន់តែលឿន ជាមួយមុខងារស្វែងរកនៅផ្នែកខាងឆ្វេងរបស់វិបសាយ។ម្យ៉ាងទៀតលោកអ្នកក៏អាចផ្សាយលក់ទំនិញដោយសេរីនឹងមិនគិតថ្លៃបានទៀតផង។

Motherboard ស៊េរីថ្មីគឺ ROG Maximus V GENE ចុងក្រោយបង្អស់របស់ ASUS

samnang — Thu, 17 May 2012 07:35:53 +0000

ROG Maximus V GENE ជាប្រភេទ Motherboard ដែលល្អផ្ដាច់គេ និងចុងក្រោយបង្អស់របស់ក្រុមហ៊ុន ASUS ។ Motherboard ប្រភេទនេះជាជំនាន់ទី៥ហើយរបស់ ASUS ROG ដែល មានសមត្ថភាពយ៉ាងខ្លាំងសម្រាប់ការលេងហ្គេម និង Process ទិន្នន័យផ្សេងៗ។ Motherboard នេះប្រើ CPU ប្រភេទ Intel® ហើយមាន Chipset ប្រភេទ Intel®Z77 ។ វាអាចកាត់បន្ថយនូវ ការចំណាយថាមពលយ៉ាងច្រើន និងមានមុខងារផ្សេងៗដូចជា WiFi, Bluetooth, GPS, 3G/4G និងមានជម្រើសមុខងារជាច្រើនទៀត។ ម្យ៉ាងវិញទៀតវាមានសមត្ថភាពខ្ពស់ក្នុងការបញ្ចេញសូរ សំឡេងលាន់លឺខ្លាំងដោយប្រើបច្ចេកវិទ្យា SupremeFX Shielding ។

លក្ខណៈពិសេស៖

CPU : Intel® Socket 1155 for 3rd and 2nd Generation Intel® Core™ Processors.
Chipset : Intel® Z77
អង្គចងចាំ៖ Dual channel; 4 x DIMM, max. 32GB, DDR3 2800(O.C.) /2666(O.C.)/2600(O.C.)/2400(O.C.)/2200(O.C.)/2133(O.C.)/1866(O.C.)/1600/1333/1066 MHz
PCIe: 2 x PCIe 3.0/2.0 x16 (x16 or dual x8, red) 1 x PCIe 2.0 x4 (black) 1 x mini-PCIe 2.0 x1 on mPCIe ComboTM
Multi-GPU : Support 2-Way NVIDIA® SLI™ / AMD CrossFireX™ Technology / LucidLogix® Virtu™ MVP Technology
Graphic output: HDMI/DisplayPort ports LAN Gigabit Intel® Ethernet LAN USB 6 x USB 3.0; 8 x 2.0
រន្ធផ្ទុក-ទិន្នន័យ៖ 4 x SATA 6Gb/s ports 2 x SATA 3Gb/s ports 1 x eSATA 3Gb/s ports 1 x mini-SATA 3Gb/s ports on mPCIe ComboTM

MacBook Pro ថ្មីអាចនឹងមាន CPU ប្រភេទ Ivy Bridge

samnang — Thu, 17 May 2012 04:12:40 +0000

ក្នុងពេលបច្ចុប្បន្ននេះផលិតផលរបស់ក្រុមហ៊ុន Apple កំពុងតែមានភាពល្បីរន្ទឺជាខ្លាំង ដែលជាហេតុធ្វើឱ្យយើងមានការចាប់អារម្មណ៍ជាពិសេសលើផលិតផលទាំងអស់របស់ក្រុមហ៊ុន។ ផលិតផលទាំងឡាយដូចជា iPhone, iPad, iPod touch, MacBook, iMac ជាដើម បានវាយលុកយ៉ាងជ្រៅចូលទៅក្នុងទីផ្សារ ហើយនៅពេលនេះក្រុមហ៊ុនកំពុងតែរៀបចំផលិតនូវផលិតផលថ្មីៗ ដែលជាជំនាន់ក្រោយរបស់ផលិតផលខាងលើ។ ដូច្នេះហើយនៅពេលនេះកំពុងតែមានពាក្យចចាមអារ៉ាមជាច្រើនដែលផ្ដោតលើផលិតផលទាំងនោះ។

ថ្មីៗនេះមានដំណឹងថ្មីបានលេចឮមកថា Laptop ត្រកូល Macbook Pro ដែលកំពុងតែ Update នោះគឺគេនឹងដាក់បញ្ចូលនូវ Processor ថ្មីរបស់ Intel គឺ Ivy Bridge រួមជាមួយនឹង Graphics ប្រភេទ Nvidia GeForce GT650M ថែមទៀតផង។ មិនត្រឹមតែប៉ុណ្ណោះគេនឹងបន្ថែមនូវអេក្រង់ប្រភេទ Retina ហើយថែមទាំងរចនាវាឱ្យកាន់តែស្ដើងជាងមុនទៅទៀត។

សម្រាប់ Macbook ជំនាន់មុនរបស់ Apple បានប្រើ VGA ប្រភេទ Nvidia GeForce GT640M ដែល VGA ប្រភេទនេះបានដំណើរការយ៉ាងល្អសម្រាប់ Laptop របស់ Apple តែគេនឹងរំពឹងថា Nvidia GeForce GT650M នឹងអាចដំណើរការយ៉ាងល្អជាងជំនាន់មុនទៅទៀត។ ចំណែកឯអេក្រង់ប្រភេទ Retina នេះនឹងធ្វើឱ្យរូបភាពដែលបង្ហាញនៅលើអេក្រង់មានភាពច្បាស់ល្អ ត្រជាក់ភ្នែក។មិនត្រឹមតែប៉ុណ្ណោះគេអាចនឹងដាក់ឱ្យ Macbook Pro ថ្មីមានប្រព័ន្ធប្រតិបត្តិការថ្មីគឺ Mac OS Mountain Lion ថ្មីរបស់ Apple ថ្មីទៀតផង។

យើងសង្ឃឹមថារាល់លក្ខណពិសេសដែលបានរៀបរាប់ខាងលើនេះ នឹងអាចមានពិតប្រាកដសម្រាប់ Macbook Pro ជំនាន់ថ្មី។ ហើយម្យ៉ាងទៀតយើងក៏សង្ឃឹមថាវានឹងអាចបង្ហាញខ្លួននៅក្នុងពិព័រណ៍ WWDC 2012 ដែលនឹងប្រព្រឹត្តិទៅនៅថ្ងៃទី ១១ ខែមិថុនាខាងមុខនេះ។

តើអ្នកទាំងអស់គ្នាពេញចិត្តជាមួយនឹងលក្ខណពិសេសថ្មីនេះដែរឬទេ?

Epson PowerLite 93+ Projector អ្នកឯកទេសបន្ថែមនូវការជឿជាក់

samnang — Thu, 17 May 2012 03:22:29 +0000

PowerLite 93+ គឺជាម៉ាស៊ីនបញ្ចាំងរូបភាពស៊េរីថ្មីមួយទៀតរបស់ក្រុមហ៊ុន Epson ដែលភ្ជាប់មកជាមួយសមត្ថភាព និងមុខងារយ៉ាងល្អឥតខ្ចោះ។ ជាពិសេស វាអាចប្រើ HDML digital ងាយស្រួលក្នុងការតភ្ជាប់ និងការបាញ់បញ្ចាំងរូបភាពចេញមកក្រៅមិនរអាក់រអួល។ ម្យ៉ាងទៀត វាបានបំពាក់នូវខ្សែ RJ-45 ដែលជួយសន្សំសំចៃពេលវេលា និងថវិការបស់លោកអ្នកបានទៀតផង។ ចំណែកគុណភាពបង្ហាញរបស់វាវិញ អាចបង្ហាញបានក្នុងកម្រិត 1024 x 768 (XGA) និង 2400 lumens នៃពន្លឺពណ៌នៅពេលបញ្ចាំងបានយ៉ាងភ្លឺច្បាស់ត្រជាក់ភ្នែក ព្រមទាំងអាចបញ្ចេញ សំឡេងបានរហូតដល់ 16 វា៉ត់។

លក្ខណៈពិសេស៖
- ប្រព័ន្ធប្រតិបត្តិការ : 3LCD, 3-chip optical engine។
- ប្រព័ន្ធគ្រប់គ្រង : Front / rear / ceiling mount។
- ប្រភេទអេក្រង់ : Poly-silicon TFT Active Matrix។
- គុណភាពបង្ហាញ : 1024 x 768 (XGA)។
- ប្រព័ន្ធគូល័រ : 2400 lumens។
- ប្រព័ន្ធសំឡេង : 16 វ៉ាត់៕

ទស្សនាវដ្ដីវិទ្យាសាស្រ្តកុំព្យូទ័រ

The New iPad​ ចាប់​ផ្តើម​ចេញ​លក់​ជា​ផ្លូវ​ការ​នៅ​ក្នុង​ព្រះរាជាណាចក្រ​កម្ពុជា

Samsung Galaxy S III ​ទទួល​បាន​ការ​កុម្ម៉ង់​ទិញ​ ៩លាន​គ្រឿង​

ហ្វេសប៊ុក​ ក៏​បង្កើត​ Cloud Storage ​មួយ​ដែរ

ក្រុមហ៊ុន​ HP ​គ្រោង​កាត់​បន្ថយ​បុគ្គលិក​ដល់​ទៅ​ ២៥០០០នាក់

it4ug.net ​បច្ចេក​ព័ត៌មាន​វិទ្យា​ជា​ភាសា​ខ្មែរ​

ដំឡើង Driverស្វ័យប្រវត្តិ​ដោយ​ប្រើ​កម្មវិធី Driver Pack Solution

deksee.com ស្វែងរក​នឹង​ផ្សាយ​លក់​ទំនិញ​

Motherboard ​ស៊េរី​ថ្មី​គឺ ​ROG Maximus V GENE ​ចុង​ក្រោយ​បង្អស់​របស់​ ASUS

MacBook Pro ថ្មី​អាច​នឹង​មាន​ CPU ប្រភេទ​ Ivy Bridge

Epson PowerLite 93+ Projector អ្នក​ឯកទេស​បន្ថែម​នូវ​ការ​ជឿជាក់​