|
|
|
|
ទំព័រដើម >> កម្មវិធីអនុវត្តន៏ >>
ផ្នែកសរសេរកម្មវីធី> តើភាសាកម្មវិធីណាមួយដែលល្អសម្រាប់ចាប់ផ្ដើមការងារជាអ្នកសរសេរកម្មវិធីនៅប្រទេសកម្ពុជា ?
|
|
តើភាសាកម្មវិធីណាមួយដែលល្អសម្រាប់ចាប់ផ្ដើមការងារជាអ្នកសរសេរកម្មវិធីនៅប្រទេសកម្ពុជា ?
|
|
Programming Language គឺជាភាសាដែលយើងប្រើសម្រាប់សរសេរកម្មវិធីឲ្យដំណើរការលើកុំព្យូទ័រ ទូរស័ព្ទ Web-basedជាដើម ។ នៅក្នុងប្រទេសកម្ពុជាមានក្រុមហ៊ុនអភិវឌ្ឍន៍កម្មវិធី (Software Development) ជាច្រើនដែលកំពុងដំណើរការសេវាកម្មរបស់ខ្លួនក្នុងការសរសេរកម្មវិធីកុំព្យូទ័រដូចជាកម្មវិធីគ្រប់គ្រងធនាគារ គ្រប់គ្រងប្រាក់ខែ និងបុគ្គលិក គ្រប់គ្រងហាងទំនិញ សេវាកម្ម គ្រប់គ្រងសណ្ឋាគារ ប្រព័ន្ធគ្រប់គ្រងចំណាយចំណូល អភិវឌ្ឍន៍វ៉ិបសាយ កម្មវិធីក្នុងទូរស័ព្ទជាដើម ។ល។ ហើយក្នុងការអភិវឌ្ឍន៍កម្មវិធីទាំងនោះគឺក្រុមហ៊ុនបានប្រើប្រាស់ភាសាផ្សេងៗគ្នាទៅតាមធនធានមនុស្សដែលខ្លួនមាន ។ ចំពោះការប្រើប្រាស់កម្មវិធីទាំងនោះគឺអាស្រ័យទៅតាម Platform ដែលនឹងប្រើប្រាស់ ថាតើអ្នកបង្កើតកម្មវិធីឲ្យដំណើរការលើ Windows ឬLinux ដំណើរការលើកុំព្យូទ័រ ឬលើទូរស័ព្ទ ឬលើ Web ។ ឧទាហរណ៍ សម្រាប់ជំនាញ Web Development អ្នកត្រូវចេះភាសា HTML, CSS និង JavaScript ។ សម្រាប់ជំនាញ Web Programming ត្រូវចេះភាសា PHP, C#, ASP, Python, Ruby ជាដើម ។ ហើយសម្រាប់ជំនាញ Desktop/Phone programming ត្រូវចេះភាសា VB.Net, Java, Python, C/C++, C#, Perl សម្រាប់អ្នកចង់ក្លាយជាអ្នកសរសេរ Games និង Operating System ភាសា C/C++ ជាជម្រើសល្អ ។ ដើម្បីបកស្រាយនូវចម្ងល់ទាំងនេះទស្សនាវដ្ដីវិទ្យាសាស្ត្រកុំព្យូទ័របានធ្វើកិច្ចសម្ភាសន៍ជាមួយបណ្ដាក្រុមហ៊ុនអភិវឌ្ឍន៍កម្មវិធីនានានៅក្នុងប្រទេសកម្ពុជា ក៏ដូចជានិស្សិតដែលកំពុងសិក្សាផ្នែកព័ត៌មានវិទ្យាជាដើម ដើម្បីឲ្យដឹងថាតើភាសាកម្មវិធីណាមួយដែលក្រុមហ៊ុនជ្រើសរើសយកមកប្រើ ហេតុអ្វីបានជាប្រើ និងមានភាពងាយស្រួលយ៉ាងណាខ្លះ និងភាសាណាមួយដែលសិស្សនិស្សិតកំពុងសិក្សានៅសកលវិទ្យាល័យ ។
|
|
លោក ឃូ ស៊ុយឡុង អ្នកអភិវឌ្ឍន៍កម្មវិធី (Developer) នៃក្រុមហ៊ុន Yoolk Inc. បានជ្រើសយកភាសា Ruby សម្រាប់អភិវឌ្ឍន៍កម្មវិធី។ Ruby ជាភាសាសរសេរកម្មវិធីដែលមានលក្ខណៈពិសេសស្របនឹងវិធីសាស្ត្រនៃការអភិវឌ្ឍន៍កម្មវិធី (Software Development Methodology)ជំនាន់ថ្មីបំផុតហើយត្រូវបានប្រើប្រាស់ដោយក្រុមហ៊ុនធំៗ ដូចជា Google, Facebook, Twitter ជាដើម។ ហើយភាសានេះបានទទួលការពេញនិយមយ៉ាងខ្លាំងពីសំណាក់ Developer បរទេស ដោយសារ Framework របស់វាគឺ RubyOnRail ។ លោកក៏បានឲ្យដឹងដែរថាពីមុនក្រុមហ៊ុនរបស់លោកបានអភិវឌ្ឍន៍ System សម្រាប់ Yellow Page ដោយប្រើ .NET តែក្រោយពេល Yellow Page ទទួលការពេញនិយមពីអតិថិជន និងកាន់តែរីកធំឡើងៗហើយការចំណាយសម្រាប់ Server ក៏កាន់តែកើនឡើង ទើបលោកជ្រើសយក Ru by ដែលជា Open Source ហើយការចំណាយលើ Server ក៏សមរម្យ និងមានភាពងាយស្រួលខាងបច្ចេកទេសនៅពេលដែលគម្រោងកម្មវិធីមួយរីកធំ ។ លោកបានមានមតិបន្តទៀតថា Programming Language គ្រាន់តែជាភាសា ឬឧបករណ៍មួយប៉ុណ្ណោះ សម្រាប់អ្នកដែលចង់ក្លាយជាអ្នកសរសេរកម្មវិធីអាជីព ត្រូវតែដឹងពីវិធីសាស្ត្រនៃការអភិវឌ្ឍន៍កម្មវិធី និងការដោះស្រាយបញ្ហា ។
លោក ឃូ ស៊ុយឡុង បានបន្តទៀតថាប្រសិនបើយើងមើលទីផ្សារការងារផ្នែកអភិវឌ្ឍន៍កម្មវិធីក្នុងរយៈពេលខ្លីគឺភាសា .NET ត្រូវបានប្រើច្រើនបំផុតនៅប្រទេសកម្ពុជា ។ តែបើយើងមើលឲ្យវែងឆ្ងាយទៅមុននៅពេលដែលក្រុមហ៊ុនបរទេសមកវិនិយោគផ្នែកបច្ចេកវិទ្យានៅប្រទេសកម្ពុជា យើងនឹងឃើញថា ភាសា Ruby, Python និង PHP នឹងត្រូវបានគេជ្រើសរើស ។ តែទោះជាយ៉ាងណាក៏ដោយដើម្បីក្លាយជា Developer អ្នកគួរតែចេះភាសា Programមួយឲ្យច្បាស់ នោះអ្នកនឹងមានភាពងាយស្រួលក្នុងការរៀនភាសាដទៃ ឧទាហរណ៍ដូចគ្រប់ Developersនៃក្រុមហ៊ុន Yoolk Inc. ពួកគេសុទ្ធតែមានជំនាញខាង .NET ច្បាស់ ពេលផ្លាស់មកប្រើភាសា Ruby គឺចំណាយពេលស្វែងយល់តែបន្តិចប៉ុណ្ណោះហើយពួកគេអាចប្រើប្រាស់វាដោយរលូន ។
|
|
លោក ហ៊ី ចាន់ហាន Software Manager នៃក្រុមហ៊ុន Green ICT Technology Inc. បានឲ្យដឹងថាក្រុមហ៊ុនលោកប្រើប្រាស់គ្រប់ភាសាទាំង Microsoftនិង Open Source ទៅតាមតម្រូវការរបស់អតិថិជន តែលោកក៏បានជ្រើសរើសភាសាចម្បងសម្រាប់Web-based Technology គឺប្រើ PHP ក្នុងការសរសេរប្រព័ន្ធគ្រប់គ្រងដូចជា៖ Point of Sale, Hotel Management System, HR Management System, Accounting Management System និងការអភិវឌ្ឍន៍វ៉ិបសាយ ។ល។ មូលហេតុដែលក្រុមហ៊ុនលោកជ្រើសរើសយកភាសានេះ ក៏ព្រោះតែវាជាកម្មវិធីកូដចំហ និងអនុញ្ញាតឲ្យក្រុមហ៊ុនសរសេរកូដបន្ថែមតាមតម្រូវការនៃប្រព័ន្ធគ្រប់គ្រងដែលមានស្រាប់ និងដោយសារវាជាតម្រូវការនៃទីផ្សារនៅកម្ពុជាបច្ចុប្បន្ន ព្រមទាំងធនធានមនុស្សក៏សម្បូរណ៍ ។ លោកបានផ្ដល់ជាមតិយោបល់ផងដែរថា និស្សិតយើងគួរខំសិក្សាភាសា PHPសម្រាប់ Web-based Software Development និង Javaសម្រាប់ Desktop Software Development ព្រោះជាភាសាដែលគេកំពុងពេញនិយមនៅក្នុងពិភពលោក និងសម្រាប់ទីផ្សារការងារនៅកម្ពុជាផងដែរ ។
ចំណែក លោក ផ្លុង លីឌឿន នាយកក្រុមហ៊ុន ប្ល៊ូតិចណូឡូជី បង្ហាញឲ្យដឹងថាសម្រាប់ក្រុមហ៊ុនលោក បានជ្រើសយក .NET ជាភាសាសម្រាប់សរសេរបង្កើតកម្មវិធីនានា ព្រោះទី១ ប្រទេសកម្ពុជាសម្បួរធនធានមនុស្សខាង .NET ដោយសារសាកលវិទ្យាល័យផ្នែកព័ត៌មានវិទ្យាស្ទើរទាំងអស់បង្រៀនផ្ដោតទៅលើពពួក .NET ទី២ ធ្វើការងារបានលឿន និងផ្ដល់នូវផលិតភាព ។ លោកបានបន្តឲ្យដឹងថាដើម្បីក្លាយជាProgrammer ជំនាញយើងត្រូវតែពូកែដោះស្រាយបញ្ហានិងយល់ពីវិធីសាស្ត្រក្នុងការធ្វើគម្រោងនីមួយៗ ព្រមទាំងត្រូវមានចំណេះដឹងផ្នែកគណិតវិទ្យា និងស្ថិតិជាសំខាន់ ។ចំណែកភាសាសរសេរ (Programming Language) គ្រាន់តែជាឧបករណ៍សម្រាប់យកមកសរសេរដោះស្រាយបញ្ហាដូច្នេះយើងអាចសិក្សាភាសាសរសេរកម្មវិធីណាមួយក៏បានតែត្រូវយល់ស៊ីជម្រៅនិងចេះឲ្យច្បាស់ នោះភាសាហ្នឹងជាភាសាដែលល្អជាងគេហើយ។ លោកបានផ្ដល់អនុសាសន៍បន្ថែមថាដើម្បីជ្រើសរើសភាសាមួយមករៀនឲ្យស៊ីជម្រៅគ្រប់គ្នាត្រូវដឹងថាតើខ្លួនចង់ធ្វើអ្វី ឧទាហរណ៍ចង់ក្លាយជា Web-based Apps developer ជា Desktop applications programmer ឬជាMobile Apps programmerជាដើម ព្រោះភាសានីមួយៗមានចំណុចពិសេសរៀងៗខ្លួនសម្រាប់ Platforms នានាដូចជា Windows, Linux, Mac, Mobile, Web-based។
|
|
លោក ឆោម សំអាត ប្រធានគ្រប់គ្រងនៃក្រុមហ៊ុន Perfex Technology បានឲ្យដឹងថាក្រុមហ៊ុនរបស់លោកអភិវឌ្ឍន៍កម្មវិធីដោយប្រើប្រាស់ភាសា C# មូលហេតុដែលលោកជ្រើសភាសានេះព្រោះគោលគំនិតនៃមូលដ្ឋានគ្រឹះរបស់ Code គឺប្រហាក់ប្រហែល Java ហើយលោកមានបទពិសោធន៍ច្រើនជាមួយ Java ដូច្នេះលោកមានភាពងាយស្រួលក្នុងការចាប់យកភាសា C# ។ សម្រាប់ធនធានមនុស្សផ្នែក Java Programming ក៏ដូចជា C# នៅកម្ពុជាមិនសូវសម្បូរទេ។ លោកបានបន្តទៀតថា C# មានភាពងាយស្រួលជាងភាសាដទៃក្នុងការបង្កើតកម្មវិធី ហើយប្រភពធនធានទៀតសោតក៏សម្បូរសម្រាប់ស្វែងរកក្នុងបណ្ដាញអ៊ីនធឺណិត។
ក្រុមហ៊ុនទាំងអស់ខាងលើមានគោលគំនិតដូចគ្នាក្នុងការជ្រើសរើសបុគ្គលិកមកបម្រើការជាអ្នកសរសេរកម្មវិធី គឺឲ្យអាទិភាពជាសំខាន់ទៅលើសិស្ស និស្សិតដែលមានចំណង់ និងទឹកចិត្តចង់ក្លាយជា Programmer ឬ Developer ពិតប្រាកដ មានចំណូលចិត្តក្នុងការសរសេរកូដ ព្រមទាំងយកចិត្តទុកដាក់ស្វែងយល់នូវបច្ចេកទេស និងបច្ចេកវិទ្យាថ្មីៗ ហើយក្រុមហ៊ុនរីករាយនឹងជួយធ្វើការបណ្ដុះបណ្ដាលបន្ថែមទៀតផង ។
ក្រោយពីជួបសម្ភាសន៍ជាមួយក្រុមហ៊ុននានារួចមកក្រុមការងារក៏បានធ្វើការជួប និងសម្ភាសន៍ជាមួយនិស្សិតដើម្បីស្វែងយល់អំពីចំណាប់អារម្មណ៍របស់ពួកគេស្ដីអំពីភាសាសរសេរកម្មវិធី។
លោក ស ពិសី បច្ចុប្បន្នជានិស្សិតឆ្នាំទី៤ ផ្នែកព័ត៌មានវិទ្យានៃសកលវិទ្យាល័យភូមិន្ទភ្នំពេញ បានរៀបរាប់ឲ្យដឹងថាពីឆ្នាំទី១ រហូតដល់ឆ្នាំទី៤សាលាបានបង្រៀនភាសាដូចជា C, C++, VB, Java និង VB.NET ហើយលោកបានជ្រើសយកភាសា VB.NETសម្រាប់ធ្វើការងារ ព្រោះលោកយល់ថា VB.Net ជាភាសាប្រភេទ OOP (Object Oriented Programing) មានគេនិយមចូលចិត្តប្រើច្រើន ម៉្យាងទៀតVB.Net បានជួយសម្រួលដល់ការងាររបស់គេបានលឿនហើយថែមទាំងអាចដោះស្រាយនូវរាល់បញ្ហាផ្សេងបានយ៉ាងច្រើនដូចជាអាចប្រើជាមួយ Database និងមានTools ស្រាប់ៗសម្រាប់ប្រើប្រាស់ព្រមទាំងមាន Tools សម្រាប់ Compile ហើយ VB.NET នេះទៀតសោតវាជាស្ពានមួយសម្រាប់ឲ្យយើងឈានទៅចាប់យកភាសាផ្សេងទៀតដូចជា C# និង ASP.NET ជាដើម។ ពិសីបានបន្ថែមទៀតថាពេលបញ្ចប់ការសិក្សាលោកនឹងអាចស្វែងរកការងារនៅតាមក្រុមហ៊ុនដែលត្រូវការProgrammer ព្រោះសាលាបានបង្រៀនសុទ្ធតែភាសាគ្រឹះដែលគេអាចយកទៅបំបែកក្នុងការប្រើប្រាស់ភាសាផ្សេងទៀត ម្យ៉ាងទៀតសាលារបស់លោកពេលនេះបានតម្រង់ទិសនិស្សិតឲ្យចាប់យក VB.NET ដោយបញ្ចូលទៅក្នុងកម្មវិធីសិក្សាតែម្ដង។
ចំណែក កញ្ញា វណ្ណាត និស្សិតឆ្នាំទី៥ ផ្នែកវិស្វករ និង លោក វឌ្ឍនា និស្សិតផ្នែកបច្ចេកទេសជាន់ខ្ពស់ឆ្នាំទី3ផ្នែកបច្ចេកវិទ្យា នៃ វិទ្យាស្ថានបច្ចេកវិទ្យាកម្ពុជា (តិចណូ) បានឲ្យដឹងថាសាលារបស់ពួកគេបានបង្រៀនភាសា Java, C++, VB និង PHP ហើយពួកគេចូលចិត្ត Java, C++ និង PHP ព្រោះ ថា ភាសាទាំងនេះវាបានធ្វើឱ្យគេចាប់អារម្មណ៍ហើយយើងអាចប្រើដើម្បីបង្កើតជាកម្មវិធី សម្រាប់កម្សាន្តនិងគ្រប់គ្រងទិន្នន័យតាមសាលា ឬក្រុមហ៊ុន ព្រមទាំងអាចជួយសម្រួលដល់ការងារផ្សេងៗផងដែរ ។ ពួកគេបានបន្តទៀតថាទោះបីជាសាលាបានបង្រៀនពួកគេនូវភាសាជាច្រើនក៏ដោយ តែការបង្រៀននោះគឺបានផ្ដោតសំខាន់ទៅលើតែ គោលគំនិត (Concept) និង Algorithm ដែលនេះបានផ្ដល់ភាពងាយស្រួលដល់ពួកគេក្នុងការចាប់យកភាសាណាមួយមកអនុវត្ត។ សាលាបង្រៀនពួកគេតែចំណុចគោលៗ និងចម្បងៗតែប៉ុណ្ណោះដូច្នេះគ្រប់គ្នាត្រូវសិក្សាស្រាវជ្រាវ ស្វែងរកនិងស្វែងយល់ពីវិធីសាស្ត្រក្នុងការបង្កើតកម្មវិធី និងពីរបៀបប្រើប្រាស់ភាសាផ្សេងៗបន្ថែមទៀត។
ឆ្លងតាមបទសម្ភាសន៍ខាងលើនិងតាមបទពិសោធន៍នៃទស្សនាវដ្ដីយើងខ្ញុំដែលធ្លាប់បានទំនាក់ទំនងជាមួយក្រុមហ៊ុន និងស្ថាប័ននានាជាច្រើន ឃើញថាអ្នកគួរតែជ្រើសរើស .NET, Java ឬ PHP ដើម្បីសិក្សាឲ្យបានស៊ីជម្រៅសម្រាប់ទីផ្សារការងារជាអ្នកសរសេរកម្មវិធីនៅក្នុងប្រទេសកម្ពុជាបច្ចុប្បន្នជាមួយបណ្ដាក្រុមហ៊ុនទាំងនោះ។
|
|
|
|
|
|
|
|
|
|
|