អង្គការ VCD សហការជាមួយក្រុមហ៊ុន CM បើកវគ្គបណ្តុះបណ្តាលនៅខេត្តកំពង់ធំ
នៅថ្ងៃទី ២៥ និង២៦ ខែសីហាកន្លងទៅ លោកនាយកក្រុមហ៊ុនទស្សនាវដ្ដីវិទ្យាសាស្ត្រកុំព្យូទ័រ CM បានចូលរួមសហការជាមួយនឹង លោកនាយកនៃអង្គការអភិវឌ្ឍន៍ទស្សនៈកម្ពុជា VDC បានបើកវគ្គបណ្ដុះបណ្ដាលមួយស្ដីពី ការផ្លាស់ប្ដូរខ្លួនឯងឱ្យក្លាយជាអ្នកដែលរឹងមាំ នៅក្នុងសាលាគរុកោសល្យ ខេត្តកំពង់ធំ ដែលមានសិក្ខាកាមចូលរួមយ៉ាងកុះករ។
វគ្គបណ្ដុះបណ្ដាលនេះរៀបចំឡើងក្នុងគោលបំណងផ្តល់ឱ្យសិក្ខាកាមនូវចំណេះដឹង បទពិសោធន៍ និងគន្លឹះក្នុងការផ្លាស់ប្តូរផ្នត់គំនិត និងឥរិយាបថជាវិជ្ជមាន ដែលប្រកបដោយប្រសិទ្ធិភាព ក្នុងការរៀបចំ ធ្វើផែនការ ដើម្បីសម្រេចនូវគោលដៅនៃជីវិតដោយភាពជោគជ័យ។
ក្នុងរយៈពេល ២ថ្ងៃនៃវគ្គបណ្ដុះបណ្ដាលនេះ ធ្វើឱ្យសិក្ខាកាមទាំងអស់ ទទួលបានចំណេះដឹង ចំណេះធ្វើ និងមានការផ្លាស់ប្ដូរយ៉ាងពិតប្រាកដ ពីភាពភ័យខ្លាច ទៅជាអ្នកជាក្លាហានដ៏រឹងមាំ។ មិនត្រឹមតែប៉ុណ្ណោះទៀតសោត សិក្ខាកាមបានបញ្ចេញនូវអារម្មណ៍រំភើបសប្បាយរីករាយ ត្រេចអរក្រៃលែង ព្រោះពួកគេមិនដែលធ្លាប់ជួបសិក្ខាសាលាបែបនេះទេពីមុនៗមក ដែលបង្កប់ដោយបច្ចេកទេសចិត្តសាស្ត្រក្នុងការផ្លាស់ប្តូរផ្នត់គំនិត និងជីវិតរស់នៅប្រកបដោយប្រសិទ្ធភាពខ្ពស់។
ក្រោយពីវគ្គបណ្ដុះបណ្ដាលនេះបានបញ្ចប់ទៅ សិក្ខាកាមទាំងអស់បានបញ្ចេញមតិស្ងប់ស្ងែងកោតសរសើរនូវវគ្គបណ្ដុះបណ្ដាលនេះដែលមិនធ្លាប់មានពីមុនមកថា វគ្គបណ្ដុះបណ្ដាលដែលពួកគេបានសិក្សានេះពិតជាធ្វើឱ្យជីវិតរបស់ពួកគេមានការផ្លាស់ប្ដូរជាវិជ្ជមាន ព្រោះបានផ្ដល់ឱកាសឱ្យពួកគេបានបញ្ចេញមតិយោបល់ជាសាធារណៈ ការធ្វើការជាក្រុម និងការប្ដេជ្ញាចិត្តផ្ទាល់ខ្លួនដើម្បីសម្រេចគោលដៅនៃជីវិតទៅថ្ងៃអនាគត ហើយថែមទាំងបានស្នើឱ្យលោកសាស្ត្រាចារ្យបន្តបើកវគ្គបណ្ដុះបណ្ដាលថ្មីបន្ថែមទៀត ដើម្បីឱ្យពួកគេទទួលបានចំណេះដឹងកាន់តែច្រើនថែមទៀត ជាប្រយោជន៍ធ្វើឱ្យដំណើរជីវិតរបស់ពួកគេឆ្ពោះទៅរកភាពជោគជ័យឥតឈប់ឈរ៕ បន្ទាប់មកមានការថតរូបរួមគ្នា ដើម្បីទុកជាអនុស្សាវរីយ៍៕
