Xbox 720 នឹងភ្ជាប់មកជាមួយដៃបញ្ជាដោយមានអេក្រង់ Tochscreen
ក្នុងអំឡុងចុងឆ្នាំ២០១១ រហូតដល់បច្ចុប្បន្នយើងបានឮពាក្យចចាមអារ៉ាមជាច្រើនអំពី Xbox 720 របស់ក្រុមហ៊ុន Microsoft ដែលវានៅតែជាមន្ទិលពីកាលបរិច្ឆេទ និងតម្លៃលក់លើទីផ្សារ។
យោងតាមព័ត៌មានចុងក្រោយពីទស្សនាវដ្ដី Xbox World បានឱ្យដឹងថា Xbox 720 វានឹងមានប្រដាប់បញ្ជាដោយភ្ជាប់ជាមួយនឹង អេក្រង់ Touchscreen ដែលបានរចនាឡើងនៅចំកណ្ដាលនៃប្រដាប់បញ្ជា រួមជាមួយប៊ូតុងបញ្ជាជាច្រើននៅអមសងខាងផងដែរ។ ប្រដាប់បញ្ជាមួយនេះអាចប្រើជំនួសប្រដាប់បញ្ជាពីចម្ងាយ នៅលើអេក្រង់ TV របស់វាហើយក៏អាចប្រើប្រាស់ Browser ដើម្បីឆែក Internet បាន ហើយថែមទាំងមានប៊ូតុងជាច្រើនសម្រាប់ជួយសម្រួលការលេងហ្គេមរបស់អ្នកឱ្យមានភាពងាយស្រួល។ មិនតែប៉ុណ្ណោះវាមានអេក្រង់លក្ខណៈ Portable ដែលអាចលេងហ្គេមដោយមិនបាច់មាន TV។
តាមព័ត៌មានបន្ថែមដែលបានពីទស្សនាវដ្ដីដែលបានធ្វើឱ្យភ្ញាក់ផ្អើលដល់អ្នកអាននោះត្រង់ថា៖ Xbox 720 នឹងត្រូវបានរចនារូបរាងឡើងយ៉ាងស្រស់ស្អាតជាមួយនឹងពណ៌ខ្មៅគ្រើមហើយអាចបញ្ចេញសំឡេងបានដោយម៉ាស៊ីនរបស់វាផ្ទាល់ជាពិសេសអ្នកអាចលេងហ្គេម បានចំនួនមនុស្ស៤នាក់ថែមទៀត។
ប៉ុន្តែអ្វីដែលជាដំណឹងអាក្រក់សម្រាប់អតិថិជនតម្លៃ Xbox ជំនាន់ក្រោយនេះ វាថ្លៃបន្តិចបើប្រៀបធៀបនឹង Xbox 360។ តាមរបាយការណ៍បានឱ្យដឹងថា Xbox 720 វាមានតម្លៃប្រហែល ៦២៨$ លើទីផ្សារអន្តរជាតិ ប៉ុន្តែនេះមិនមែនជាតម្លៃផ្លូវការរបស់វាទេគឺអាស្រ័យទៅលើលក្ខណៈពិសេសរបស់ Xbox 720 និងកញ្ចប់ដែលភ្ជាប់ជាមួយវា៕
