Panda Anti-virus បានធ្វើសិក្ខាសាលាចែករំលែកចំណេះដឹងនៅសាកលវិទ្យាល័យ CUS
កាលពីព្រឹកថ្ងៃទី ១០ ខែ កុម្ភៈ ឆ្នាំ២០១២ ក្រុមហ៊ុន PerfexTech បានធ្វើសិក្ខាសាលានៅសាកលវិទ្យាល័យឯកទេសនៃកម្ពុជា (CUS) សាខាទួលគោករាជធានីភ្នំពេញក្រោមប្រធានបទ “ពាណិជ្ជកម្មអាជីវកម្មនិងបច្ចេកវិទ្យា” ដោយមានការចូលរួមយ៉ាងច្រើនកុះករពីសំណាក់សិស្សនិស្សិតផ្នែកព័ត៌មានវិទ្យា សេដ្ឋកិច្ចធនាគារហិរញ្ញវត្ថុនិងផ្នែក គ្រប់គ្រងរួមទាំងបុគ្គលិកសិក្សានៃសាកលវិទ្យាល័យផងដែរ។ ការរៀបចំសិក្ខាសាលានេះឡើងក្នុងគោលបំណងដើម្បីឱ្យសិស្សនិស្សិតយល់ដឹងពីប្រភេទមេរោគកុំព្យូទ័រ របៀបការពារកុំព្យូទ័រដោយប្រើកម្មវិធីកម្ចាត់មេរោគ Panda និងការធ្វើអាជីវកម្មជាមួយនឹងបច្ចេកវិទ្យា។ នេះជាឱកាសដ៏ល្អបំផុតដែលសាកលវិទ្យាល័យ CUS បានសហការណ៍ជាមួយក្រុមហ៊ុន PerfexTech ដើម្បីរៀបចំកម្មវិធីនេះឡើង។ លោកបណ្ឌិត សំ ប៊ុនណែល ជាអ្នកតំណាងឱ្យសាកលវិទ្យាល័យ CUS បានមានប្រសាសន៍ថា “សព្វថ្ងៃនេះបច្ចេកវិទ្យាមានការរីកចម្រើនយ៉ាងខ្លាំងវាពិតជាផ្ដល់លក្ខណៈងាយស្រួលដល់សង្គមមនុស្សប៉ុន្តែវាក៏ផ្ដល់ផលប៉ះពាល់ដល់មនុស្សផងដែរដូចជាការប្រើប្រាស់កុំព្យូទ័រជាដើមវាបានជួយមនុស្សស្ទើរគ្រប់ការងារទាំងអស់ប៉ុន្តែនៅពេលដែលកុំព្យូទ័រមានបញ្ហាដោយការឆ្លងមេរោគការលួចទិន្នន័យតាមអ៊ីនធឺណិតជាដើមគឺវាទាមទារឱ្យមានកម្មវិធីកម្ចាត់មេរោគដូចនេះវាជាការប្រសើរបំផុតដែលក្រុមហ៊ុន PerfexTech បាននាំកម្មវិធីកម្ចាត់មេរោគ Panda នេះមកហើយវាក៏ជាការចែករំលែកចំណេះដឹងផ្នែកព័ត៌មានវិទ្យា IT ដ៏ល្អបំផុតសម្រាប់និស្សិត CUS ។” បន្ទាប់ពីលោកបណ្ឌិតមានប្រសាសន៍រួច លោកជី សុផាត ជាមន្ត្រីទីផ្សាររបស់ក្រុមហ៊ុន PerfexTech បានធ្វើបទបង្ហាញស្ដីពីមេរោគកុំព្យូទ័រនិងវិធីការពារក្នុងពិភពអ៊ីនធឺណិត ហើយការធ្វើបទបង្ហាញនេះផ្ដោតទៅលើប្រភេទមេរោគកុំព្យូទ័រ ដូចជាមេរោគTrojan , Win 32, Key Logger, Spam ជាដើមដែលវាភ្ជាប់ខ្លួនទៅនឹងឯកសារ Patch/Crack ក្នុងកុំព្យូទ័ររបស់យើង។ម្យ៉ាងវិញទៀតការចម្លងមេរោគចូលទៅក្នុងកុំព្យូទ័រ មានតាមរយៈជាច្រើនដូចជាការប្រើប្រាស់អ៊ីនធឺណិតការចម្លងតាម Flash, External HDD ជាដើមដោយពពួកមេរោគទាំងនោះវាបានបំផ្លាញឯកសារឬលួចទិន្នន័យរបស់យើង។ លោកបានបន្ថែមទៀតថាដើម្បីការពារនូវមេរោគទាំងអស់នោះគឺមានតែកម្មវិធីកម្ចាត់មេរោគ Panda តែប៉ុណ្ណោះហើយជាកម្មវិធីបាននាំចូលមកពីប្រទេសអេស្ប៉ាញ វាអាចការពារកុំព្យូទ័រនិង ការពារទិន្នន័យរបស់យើងឱ្យមានសុវត្ថិភាពគ្រប់ពេល។ ស្របពេលនោះដែរលោក បេ ចន្រ្តា ដែលជានាយកគ្រប់គ្រងកម្មវិធីកម្ចាត់មេរោគ Panda ក៏បានធ្វើបទបង្ហាញមួយស្ដីអំពីអាជីវកម្មនិងទីផ្សារក្នុងសម័យបច្ចេកវិទ្យាដោយលោកបានបង្ហាញពីការធ្វើទីផ្សារតាមប្រព័ន្ធបច្ចេកវិទ្យាដូចជាតាមប្រព័ន្ធអ៊ីនធឺណិត Facebook, Twitter, Google Plus ជាដើមដែលអាចរកប្រាក់ចំណូលបានយ៉ាងច្រើនដោយងាយស្រួលហើយមិនចាំបាច់ចំណាយទុនច្រើន។ ម្យ៉ាងវិញទៀត លោកក៏បានបង្ហាញពីបទពិសោធន៍ផ្ទាល់ខ្លួនរបស់លោកផងដែរទាក់ទងនិងការធ្វើអាជីវកម្មខាងផ្នែកបច្ចេកវិទ្យាដល់និស្សិតទាំងអស់ដែលបានចូលរួម។ ខណៈដែលលោកមានប្រសាសន៍ចប់និស្សិតម្នាក់ឈ្មោះ យី គាន រៀនផ្នែកព័ត៌មានវិទ្យាឆ្នាំទី ១ នៃសាកលវិទ្យាល័យ CUS ដែលបានចូលរួមសិក្ខាសាលានេះបានមានចំណាប់អារម្មណ៍ថាគាត់ពេញចិត្តយ៉ាងខ្លាំងចំពោះការតាំងបង្ហាញកម្មវិធីកម្ចាត់មេរោគ Panda នេះព្រោះវាអាចការពារកុំព្យូទ័រពីពពួកមេរោគនិងពួក Hacker បានផងដែរ។ លោក អេង ឧត្តម និស្សិត IT ឆ្នាំទី៣ នៃសាកលវិទ្យាល័យ CUS ក៏មានចំណាប់អារម្មណ៍ចំពោះសិក្ខាសាលានេះដែរថាសិក្ខាសាលានេះបានផ្ដល់ចំណេះដឹងយ៉ាងល្អជុំវិញបញ្ហាមេរោគដល់ពួកនិស្សិត IT ដូចជារូបគាត់ផងដែរម្យ៉ាងវិញទៀតវាក៏បានបង្ហាញពីផលិតផលថ្មីមួយដែលពោរពេញទៅដោយសមត្ថភាពនៅក្នុងការការពារមេរោគពីកុំព្យូទ័រ។ ខណៈពេលនោះដែរ ព្រះតេជគុណមួយអង្គព្រះនាម សាយ សុខេង ដែលកំពុងសិក្សាផ្នែកធនាគារនិងហិរញ្ញវត្ថុក៏មានចំណាប់អារម្មណ៍ចំពោះការធ្វើបទបង្ហាញរបស់លោក បេ ចន្ត្រា ផងដែរថា ទីផ្សារបច្ចុប្បន្នគឺមានការប្រកួតប្រជែងយ៉ាងខ្លាំងដូចនេះទីផ្សារផ្នែកបច្ចេកវិទ្យាក៏តម្រូវឱ្យយើងចេះរិះរកយុទ្ធសាស្ត្រនៅក្នុងការធ្វើអាជីវកម្មផងដែរដូចនេះវាតម្រូវឱ្យយើងចេះផ្សព្វផ្សាយផលិតផលរបស់យើងតាមរយៈបណ្ដាញសង្គមដូចជា Facebook ជាដើម ហើយម្យ៉ាងវិញទៀតការធ្វើអាជីវកម្មតាមបច្ចេកវិទ្យាគឺអាចរកចំណូលយ៉ាងងាយបំផុត។ នៅវេលាម៉ោងប្រហែល ១០:៣០ នាទីការប្រារព្ធនៃសិក្ខាសាលានេះត្រូវបានបញ្ចប់យ៉ាងរលូននិងប្រកបដោយភាពស្និទ្ធស្នាលបំផុត៕
