ក្រុមហ៊ុន Corning និង Samsung សហការគ្នាដើម្បីភ្ជាប់ Lotus Glass ទៅក្នុងអេក្រង់ OLED
ក្រុមហ៊ុន Corning ដែលត្រូវបានគេស្គាល់ថាជាក្រុមហ៊ុនផលិត Gorilla Glass មានគុណភាពល្អជាងគេបានប្រកាសថានឹងចុះកុងត្រារួមសហការគ្នាជាមួយក្រុមហ៊ុន Samsung ដើម្បីផលិតកែវថ្លាសម្រាប់អេក្រង់ OLED ឱ្យបានល្អជាងមុន។ ការរួមសហការនេះនឹងធ្វើឡើងនៅក្នុងប្រទេសកូរ៉េខាងត្បូង ហើយព្រមទាំងភ្ជាប់អេក្រង់ប្រភេទ OLED របស់ Samsung ជាមួយនឹងបច្ចេកវិទ្យា Lotus Glass របស់ក្រុមហ៊ុន Corning។ អេក្រង់ប្រភេទថ្មីនេះនឹងប្រើប្រាស់នៅក្នុងទូរស័ព្ទឱ្យបានល្អដូចនៅក្នុងផលិតផលធំៗដែរដូចជាទូរទស្សន៍ជាដើម ហើយវានឹងត្រូវប្រើប្រាស់នៅក្នុងផលិតផលរបស់ Samsung ទាំងអស់ និងលក់វាទៅឱ្យក្រុមហ៊ុនផ្សេងទៀតរបស់កូរ៉េ។
គួរបញ្ជាក់ផងដែរថាក្រុមហ៊ុនទាំងពីរទទួលបានជោគជ័យក្នុងភាពជាដៃគូរជាមួយគ្នាអស់រយៈពេលជាយូរមកហើយក្នុងការផលិតអេក្រង់កញ្ចក់។ លោក Wendell P. Weeks អគ្គនាយកក្រុមហ៊ុន Corning បាននិយាយថា៖ កម្លាំងនៃភាពជាដៃគូក្នុងមុខជំនួញរបស់យើង បានធ្វើឡើងនៅលើសមត្ថភាពរបស់ Corning ក្នុងការអភិវឌ្ឍន៍ និងការផលិតនូវកញ្ចក់ជាមួយនឹងបច្ចេកវិទ្យាចុងក្រោយ ដែលវាជាគន្លឹះធ្វើឱ្យ Samsung ទទួលបានជោគជ័យជាមួយអេក្រង់ផលិតផលរបស់ខ្លួន៕
