កម្មវិធីកម្ចាត់មេរោគកុំព្យូទ័រ Panda Security មកដល់ខេត្តបន្ទាយមានជ័យ
កាលថ្ងៃទី៣០ខែមករាឆ្នាំ២០១២ នៅសាកលវិទ្យាល័យបៀលប្រាយ សាខាខេត្តបន្ទាយមានជ័យ ក្រុមហ៊ុន PerfexTech បានធ្វើសិក្ខាសាលាមួយស្ដីពី “ពាណិជ្ជកម្មអាជីវកម្មនិងបច្ចេកវិទ្យា” ដែលមាននិស្សិតចូលរួមចំនួន ១៥០នាក់ មកពីជំនាញគ្រប់គ្រង ពាណិជ្ជកម្ម ហិរញ្ញវត្ថុ ធនាគារ និងព័ត៌មានវិទ្យា។ ក្នុងឱកាសនោះដែរមានការអញ្ជើញចូលរួម និងប្រកាសបើកកម្មវិធី ដោយលោកនាយកសាខានៃសាកលវិទ្យាល័យបៀលប្រាយ។ លោកបានមានប្រសាសន៍ថា៖ នេះជាឱកាសដ៏វិសេសវិសាលណាស់ ដែលខាងក្រុមហ៊ុន PerfexTech អ្នកនាំចូលកម្មវិធីកម្ចាត់មេរោគ Panda Security បានចំណាយពេលសម្រាប់ធ្វើសិក្ខាសាលាមួយនេះដែលជាទុនមួយក្នុងសម័យបច្ចេកវិទ្យា សម្រាប់និស្សិតនៅសាកលវិទ្យាល័យបៀលប្រាយ សាខាខេត្តបន្ទាយមានជ័យ។ បន្ទាប់ពីលោកនាយកសាខាបានប្រកាសបើកម្មវិធីរួចមក លោក ជី សុផាត មន្ត្រីទីផ្សាររបស់ក្រុមហ៊ុន PerfexTech ក្រោមប្រធានបទ “មេរោគកុំព្យូទ័រនិងការការពារក្នុងពិភពអ៊ីនធឺណិត” ដែលបានធ្វើឱ្យមានចំណាប់អារម្មណ៍យ៉ាងខ្លាំងចំពោះនិស្សិតខេត្តបន្ទាយមានជ័យ ស្ដីពីមេរោគកុំព្យូទ័រ និងវិធីសាស្ត្រការពារកុំឱ្យមេរោគមកយាយីលើទិន្នន័យដោយប្រើកម្មវិធីកម្ចាត់មេរោគស្ថិតក្នុងលំដាប់លេខ ១ មកពីប្រទេសអេស្ប៉ាញ គឺកម្មវិធីកម្ចាត់មេរោគ Panda Security ដែលមានសមត្ថភាពខ្ពស់ក្នុងការទប់ស្កាត់មេរោគដូចជា Virus, Worms, Trojans, Malwares, Spam, Spyware, Adware, Hacker ក៏ដូចជាការបោកបញ្ឆោតលើអ៊ីនធឺណិត។ ពេលនោះដែរលោក បេ ចន្ត្រា ដែលជានាយកគ្រប់គ្រងកម្មវិធីកម្ចាត់មេរោគ Panda Security បានធ្វើបទបង្ហាញស្ដីពី “អាជីវកម្មនិងទីផ្សារក្នុងយុគសម័យបច្ចេកវិទ្យា” ដែលបានទាញចំណាប់អារម្មណ៍សម្រាប់និស្សិតអំពីការផ្លាស់ប្ដូរផ្នត់គំនិតនិងសកម្មភាពមួយចំនួនអំពីការលក់ការធ្វើទីផ្សារនិងការធ្វើអាជីវកម្មនាសម័យបច្ចេកវិទ្យា។ លោក បេ ចន្ត្រា ក៏បានបង្ហាញពីបទពិសោធន៍ជីវិតជាច្រើនដែរធ្វើឱ្យនិស្សិតមានចំណាប់អារម្មណ៍និងមានសំនួរជាច្រើនត្រូវបានចោទសួរធ្វើអោយសិក្ខាសាលាមួយនេះបានបញ្ចប់ដោយភាពរីករាយនិងស្និទ្ធស្នាលជាទីបំផុត៕
